-
salam,
iseng-iseng kepikiran pengen belajar nulis cerita silat.
Ini cerita sengaja dibikin khas Betawi, baik tokoh, tempat, bahasa, dan budaya nya.
Mohon maap kalo di dalam kalimatnya banyak bikin bingung sobat2 sekalian,
maklum baru belajar,
bagi sobat2 andai ada kalimat yang bikin bingung,
silaken ditanyaken artinya
insyaallah bang jali ama bang Dboels bisa kasih penjelasan.
Cerita ini cuma fiktif dan rekayasa sendiri,
terbuka bagi temen2 yang mau menambah jalannya cerita..
silakan, diinterupsi juga boleh
bahkan interupsi malah bisa menambah ide2 baru..
tabek
-
SOMAD JAGO MUDE KEBON DALEM
(1)
“Mad…Somad…!!!”
“Iye, nyaaak…”
“udah mo asar, brenti dulu latiannye. Bantuin enyak nimbe in aer, ngisi kolem. Sekalian padasan buat ngambil aer wudhu ntar engkong lu mo sembayang asar kagak ade aer nye dah.. udah nye lu mandi dulu yee sebelon sembayang asar”
“Iye, nyak. Iye, nyerocos aje…” somad brenti latian sembari ngedumel. Enyak nye emang bawel tapi Somad paham banget entu karene die anak semate wayang yang paling disayang.
Somad, lelancur umur enembelas taun emang anak atu-atunye Nyak Halimeh. Sejek ditinggal mati babe nye setaun kemaren, die cuman tinggal ama enyak same engkong nye, di Kebon Dalem, sebelah bekulon nye Rawe Bangke Ujung,Betawi. Jadi Somad sadar banget kalo die kudu berbakti ama enyak nye
Babe nye, Bang Marjuki, dikenal sebage juware maen pukulan. Orang nye gagah, teges, paling kagak demen ama yang name nye kejahatan, maling, rampok, bergajulan udah keder duluan kalo denger name Bang Marjuki. Tapi Bang Marjuk (panggilan nye) punye ati yang baek, lembut dan penyayang. Terutame ama anak bininye..Bang Marjuk ngewarisin maenan dari babe nye Kong DulAmit. Maen pukulan khas Betawi yang cepet, keras dan kude-kude rendah.
“Maen pukulan, kate Bang Marjuk, bukan buat jadi jagoan, bukan buat belagu, pental-pentil, maen keprok orang, bukan..Belajar maen pukulan gune nye supaye kite sadar ame tanggung jawab yang Alloh kasih ke kite, tanggung jawab buat jage diri, keluarge, bangse dan negare. Maen pukulan kia latih supaye kite sadar kalo dipukul tuh sakit, jadi kite kagak bakal sembarangan jatohin tangan mukul orang, di samping entu, maen pukulan juge warisan orang tue kite yang perlu kite rawat, kite jage..Sebab maen pukulan bagian dari seni budaye leluhur nyang punye nilai tinggi. Belajar maen pukulan juge buat manjangin silaturahmi dan tawadhu’ ke hadirat Alloh SWT”.
Dari mulein nginjek akil baleg, Somad udah dididik lahir batin ame babe nye. Belajar ngaji, sholat ame maen pukulan jadi makanan arian si Somad. Ngkali emang udah keturunan, Somad demen banget belajar maen pukulan. Bangun tidur sebelon subuh, ngisi kolem aer, mandi, shoalt ngaji, trus die udah latian. Pulang dari madroseh, abis sembayang lohor, die latian lagi ampe asar. Abis Isya die latian lagi ampe ampir jem 12 malem.
Sekarang udah jadi perjake, Somad mangkinan keliatan jadi. Badan nye tinggi, sedeng, kagak kurus kagak gemuk. Kulit nye gelap ciri khas anak kampung, rambutnye tebel rada kaku tapi rapi kalo di sisir tande nye die sedikit kaku orang nye tapi jujur. Jidat nye lebar, alis kereng. Kate orang-orang tue, ni anak bakalan jadi orang pinter. Idung nye mancung, mate nye rada riyep tapi tajem, bibir tipis di tambeh ama lesung pipit. Kalo dah mesem, bukan maen dah..anak perwan sekampung bakalan kagak bise tidur kalo dimesemin….
Sembari ngos-ngosan, somad jalan ke sumur buat nimbain aer ke kolem. Enyak nye masih ribet didapur nyiapin makanan buat ntrar malem.
“Nyak….kolem udah penuh, padasan juge udah aye isiin. Aye mandi dulu ye, trus langsung ke langgar nungguin engkong di sono. “Iye, Mad…” enyak nye nyaut.
“Assalamualaikum, Mad..”
“Wa alaikum salam warahmatullahi wabarakatuh…, eh engkong”
“Iye Mad, lu qomat deh. Kita jamaah dulu. Aye, Kong..” Somad qomat, ngkong ame cucu nye langsung sholat. Rapi wiridan..
Kong Sadeli, engkong nye Somad dari enyak nye. Die dikenal di Kampung Dalem sebage guru ngaji, orang nye baek banget, kagak pernah ngomel ape lagi marah-marah. “Marah tuh perbuatan syaiton” gitu kate Kong Sadeli kalo nasehatin orang nyang lagi marah. Badannye kurus tinggi, muke nye bersih, kulit nye alus mirip orang gedongan. Nyang rada aneh, sorot mate Kong Sadeli tajem banget persis piso belati yang diasah siang malem.
“Mad.., engkong mo ngomong nih”
“aye kong..”
“Gue peratiin lu rajin bener latian maen pukulan nyang babe lu ajarin, emang lu mo jadi jagoan,Mad? Babe lu kan udah kagak ade, pelajaran lu udah sampe mana?”
“Aye si kagak ade niatan mo jadi jagoan, Kong. Cuman dulu Babe perneh mesenin, lelaki kudu kuat lahir batin. Udahan lagi kate Babe nih maenan warisan Kong DulAmit, babe nye Babe. Babe kuatir nih maenan bakalan ilang kalo aye kagak tekunin. Nah aye sekarang juge bingung Kong, Babe cuman ngajarin 5 langkeh ame 3 jurus doang. Kagak pernah diajarin gune nye buat apaan. Cuman nderesin aje tuh maenan. Mangkenye ampe sekarang aye tetep aje deresin tuh langkah ame jurus, entu kan wasiat Babe, Kong..”
“Jajal lu jalanin, Mad..gue mo liat”
“Lah, pan engkong kagak demen ame maen pukulan? Engkong pan guru ngaji?”
“Udah jalanin, bawel banget luh!!” Kong Sadeli ngomel tapi mesem.
“Ye iye dah kalo engkong nyuruh mah aye siap aje.”
Somad bediri, keluar dari langgar. Belasan taun die ngederesin ni maenan, perasaan Somad die udah faseh banget. Langsung die pasang, ambil langkah satu. Ketepak-ketepok, sreet..sreet..abis.
Langkah due, langkah tige, ampe abis. Trus die maenin 3 jurus tambahan. “Udah Kong..pegimane?
“Mad..mad…belasan taun lu latian mase cuman begitu doang.. ”. Kong Sadeli komentar kayak paham aje..
“Lah emang engkong ngarti? pan aye udah jalanin cakep banget tuh..”
“Cakep apaan…gue nyang udah bau taneh aje masih bisa lebih alus dari langkah lu. Jajal sini lu pukul gue..”
“Aye kagak saleh denger nih Kong? Kapan engkong udah tue, udeh 80 taun, kagak bise maen pukulan lagi..”
“Hahahahaaaa… lu pukul dah gue. Gue sembari merem” Si Engkong mangkin manasin Somad.
“Baek Kong, tapi jangan salahin Somad ye kalo bibir engkong jontor..”
Somad siap-siap mukul. Kude-kude kuat, kaki kanan di depan ditekuk. Kaki kiri di belakang ngelebar ngebentuk letter ’ siku 90 derajat’ ngediri setengah badan. Somad mo maen curang. Tadi ngancem mo mukul bibir, tapi dari pasangannye die mo mukul lambung atawe ulu ati engkong nye. “Biar tau rase nih aki-aki..” Sreettt..wuut..tangan kanan Somad kenceng masuk, tangan kiri nye ngiring di antare sikut ame pergelangan tangannye. Die inget pesen babe nye, “setiap lu begerak, kedue tangan lu jangan jauh-jauh, iringin terus”.
“Astaghfirullah ….” Somad nyebut saking kaget nye. Die udah mukul kenceng banget, tapi engkong nye diem aje. Telat!! Pukulannye ampir nyampe, Somad kagak sempet narik lagi tangannye. Sepersekian detik lagi Kong Sadeli bakalan kelenger nih. Tapi…
GEDUBRAAKK!!
Somad kejengkang , ngusruk muke duluan nyium tanah. Bukannye sakit, Somad malahan bingung kagak abis pikir.. “Bangun, Mad…” Kong Sadeli tarik pundak Somad. Lagi-lagi aneh, tangan Kong Sadeli yang lembut mendadak kerasa keras dan kuat banget, pundak Somad kayak diremes. Otomatis die bediri ngikutin tarikan tangan engkong nye.
“Kong, Engkong tadi pake elmu gaib ye?” Somad penasaran.
“Elmu gaib pale lu peyang…Lu ngarti kagak kenape lu bise jatoh? Kapan lu udah latian be taun-taun, udah apal tiap langkah ame jurus nye, kenape lu gampang banget jatoh? Ame aki-aki lagi…”
“Aye kagak ngarti, kong..”
“Begini Mad, lu emang udah apal langkah ame jurus nye. Tapi lu baru sampe di situ doang, lu baru nyampe kulitnye, belon ampe ke kaedah-kaedah nye ape lagi roh nye tuh maenan. Tadi tuh lu bikin kesalahan fatal, begitu lu udah nyerang, pikiran lu becabang. Lu takut gue kelenger kan? Takut gue kagak kuat nahan pukulan lu? Nah, begitu pikiran lu becabang, kecepetan ame kekuatan pukulan lu jadi berkurang jauh. Gue bisa nge rase in, mad. Mangke nye gue tinggal papag aje tangan lu, gue robah arah nye, gue manpaatin tenage lu trus gue buang dah. Ngejoprak kan lu?”
“Maapin aye Kong, aye bute selame eni kagak nyadar kalo engkong ahli maen pukulan. Maapin juge tadi aye udah niat mukul ulu ati engkong…” Somad minte maap sesenggukan sembari cium tangan engkong nye.
“Udah Mad, kagak ape-ape, gue maklum lu masih mude, darah lu masih panas. Tadi gue sengaje mancing emosi lu, nah lu kudu inget, begitu lu emosi maka lu udah kalah. Lu jangan kecil ati, latian lu selama eni cukup buat jadi pondasi. Mulein sekarang, Gue bakal terusin pelajaran yang babe lu kasih, gue matengin lu punye maenan, dan…gue warisin elmu-elmu gue semue buat lu…”
“Kong….” Somad sesenggukan saking terharu nye. Die kagak pernah nyangke kalo engkong nye yang die kenal selama eni baek, lembut dan alim ternyate seorang jaware sejati. Dipeluk nye kaki engkong nye, dicium nye tangan Kong Sadeli.
“Aye bakalan belajar tekun dan taat ame semua nasehat engkong..”
“Udah deh, udah mo maghrib, lu ajan dulu, panggil tetangge-tetangge buat jamaah maghrib, abis ngaji kita mulein latian lagi”.
“Aye Kong..”
Somad kayak orang yang baru lahir lagi, semanget nye muncrat, muke nye seger, langkah nye tegep. Awal perjalan hidup baru Somad sebage JAGO MUDE KEBON DALEM di mulai ini hari..
-Bersambung-
-
[yahoo] [yahoo]
Abang kite mulai beraksi.....mantabbb.. [top] cepetan bang bikin lanjutannye...
DBoels
-
Kapan ade waktu kumpulin dah Bang Ocid bentuk sinopsisnye, nti ane nyang nyusun storyline, ane lagi milah milih cerita buat dijadiin komik cerite fiktif maupun non fiktif...insya Alloh kalo dana tabungan ane ude kekumpul banyak mao dicetakin.
Lanjuut Baaaang....!
Tabe'...Jali
-
yups...
di muke ane dah bilang kalo nih cerite
very..very opened
so, ente-ente sanget dimungkinken buat nerusin nih cerite
tabek
-
B@ng Orchid,...
Lagi kemarenan ade sinetron nyang ngangkat Somad sebage jagoan, judulnye "Unjug Gigi"...Nyang meranin Mandra ame Mastur...nonton gak? ni cerite fiksi.
Tadiannye Si Mandra mo ngebikin cerite Sabeni atawe Entong Gendut...gak tau pegimane ceritenye, kagak jadi...denger2 sih kagak dapet ijin, lantaran nyang meranin si Mandra. Coba kalo bang Sarkem nyang meranin (jadi Hantu Blau)...pasti dijinin. [lucu]
Tabe'...Jali
-
wah, kagak sempet nonton tuh, cing..
nah ni jg kagak tau kenape kok name Somad nyang nongol jadi peran utama..
-
SOMAD JAGO MUDE KEBON DALEM
(2)
Seperti biase nye ba’da Maghrib anak-anak Kampung Dalem belajar ngaji ame Kong Sadeli. Somad nyang kebetulan cucu kesayangan engkong udah puluhan kali khatam 30 jus, bace an nye faseh, tajwid nye bener, makhroj nye pas. Orang kate kalo die lagi nderesin Qur’an merdu banget, makhroj ame tartil nye jelas bekelime, bikin merinding kite nyang dengerin.
Nah Somad udah bise bantuin engkong nye ngajar ngaji, jadi murid-murid dibagi due kelompok. Kelompok yang baru belajar ame kelompok yang udah faseh tinggal matengin tajwid ame tartil nye..
Di bagian nyang masih ijo eni nih nyang ade setori romantika nye, soal nye di sini ade murid perempuan kembang mawar kampung Dalem. Name nye Nur Qomari, biase di panggil enur. Sebage mane name nye, NUR QOMARI, cahaya bulan..nih anak emang muke nye besinar terang kayak bulan tanggal lime belas, putih bersih ber cahaye. Alis nye item kereng, rambutnye lemes panjang se pinggang, item kayak areng. Idung nye mancung-bangir ngegemesin, mate nye tajem, bulu mate nye lentik. Nyang sering bikin Somad gemeteran kalo ngajarin si Enur nih, bibir nih anak..tipis merah, basah biar kagak pake lipen setip. Belon lagi kalo Somad lagi nyontohin bace an, Enur suke ngelirik Somad. Jadi dah Somad grogi. “A’uuuudzuu bi…bill..bi..billl..” Somad lupe bace audzu aje gare-gare dilirik ame Enur.
Enur anak nye Bang Solikun. Juragan Sado di Kampung Dalem, Orang nye pendiem, dan..Jawara sepangkatan Bang Marjuk. Bang Solikun masih ke itung encang nye Somad, sodare misan Bang Marjuk.
Biar kate dulu keliatan nye kagak ade masalah antare Bang Marjuk ame Bang Solikun, sebenernye ade persaingan diem-diem, Due Jawara eni sodare satu guru waktu belajar maen pukulan BELUT PUTIH dari Kong DulAmit. Bang Solikun ngerase dibeda in ame encing nye dalem hal pelajaran. Padahal sebenernye same aje, Kong Dul kagak pilih kasih. Cuman Kong Dul eni kan emang keras kalo ngajar, kalo salah ye dibentak. Kude-kude kurang betaju..abis dah didepak.
Bang Solikun merase tersinggung kalo diomelin, maklum aje name nye juge ponakan ame encing.. Bang Marjuk, biar kate ame babe nye kendiri, belajar sungguh-sungguh. Waktu besambut ame Solikun ye bebeneran, Sabet bener, tepak bener, rambet, rimpes, jugil, bentus bebeneran banget..Permaenan kedue nye same-same cakep, rapi dah.. Kalo Bang Marjuk orang nye terbuke, blak-blakan. Bang Solikun pendiem, tapi kalo sambut ye kejem juge. Pernah suatu malem, gare-gare Solikun sedikit ngelamun, pipinye kene kepret Bang Marjuk, Praakk…
“Buseett…lu bebeneran Juk?”
“Maap, Kun..nah elu ngape ngelamun aje. Kapan kate Babe pukulan keras cepet kagak bole dipentil. Tadi lu pentil, ye tangan gue ilang trus masup. Jangan salain gue kalo lu kene kepret.”
“Jadi..ayo lagi. Lu nyang masup, Juk”
Solikun pasang pake langkah tige. Kaki kiri nye di depan, kanan di belakang ngebentuk siku. Kude-kude kagak begitu lebar, sedeng aje selebar pundak, badan bediri rileks. Tangan kiri di depan, tangan kanan di belakang. Nih pasangan sebenernye pasangan buat masuk, tapi solikun cerdik. Die minte Bang Marjuk yang masuk, tapi die juga mo ngeduluin masuk.
Begitu Bang Marjuk masuk nyodok ke ulu ati nye, die pecah luar. Tangan kiri Bang solikun mapag, ditempel nye tangan Bang Marjuk, sembari dirimbang, tenage Bang Marjuk dirobah. Bebarengan tangan kanan Bang Solikun nyangkol atawe bandut kantong menyan Bang Marjuk. Seettt…Bang Marjuk pecah ke kiri, nepak mo nangkep tangan sembari bawe turun. Bang Solikun kagak kalah cepet, kaki kanan nye geser, kaki kiri nye nyabet sembari tepak gedor pake tangan kanan. Bang Marjuk kaget, pecah mundur. Diuber, pukulan susun dilancarin bang Solikun. “Awas Bang…” Gubraaaakkk!!! Mate kaki Bang Marjuk kesenggol cegatan bang solikun, keseimbangan nye ilang dan kagak ketulungan lagi die kejengkang.
Seri : satu-satu
Dari tuh setori, ampe sekarang Bang Solikun tetep merase kurang puas..
Ape lagi die peratiin Somad rajin banget latian nye. Pernah Somad minte dibenerin ame encang nye.
“Cang, Babe kan udeh kagak ade. Menurut cerite Babe, encang dulu belajar bareng babe ame engkong. Trus kate Babe lagi, encang maennye lebih rapi dari babe. Kalo bole, aye minte tulung dibenerin, Cang. Pelajaran aye dari babe bari ampe langkah ame jurus doang, belum ade sambutnye..Pegimane, cang?”
“Kagak bisa, Mad..lu belajar aje kendiri, lagian buat apaan belajar maen pukulan? Lu mo jadi jagoan kayak Babe lu? Udah deh, gue empet kalo inget jaman dulu gue belajar ame engkong lu”.
Udah, segitu doang..Somad segen minte lagi. Soal nye die paham banget kalo encang nye orang nye pendiem dan kaku. Susah diajak ngomong. Padahal Somad demen banget lame-lame di rumah encang nye. Soal nye ape lagi kalo bukan ade si Cahaya Rembulan, Nur Qomari nyang diem-diem udah ngebetot die punye ati..
-bersambung-
-
B@ng Ochid,...
Kalo bisa setting nama tempat Betawi ditonjolin, slipun fiksi. Kampung dalem daerah mane sih...? tapi kalo nyerepin name maenan BELUT PUTIH, ntu name beneran maenan anak2 Ujung Malang Bekasi. Terkenal nama maenannye Pejuang KH Nur Alie.
Tabe'...Jali
-
nah, tu die..tadi nye mo nyebut tempat beneran
tp kuatir ad salah sebut, soalnye pengetahuan kite nyang masih minim
jadi kesebut dh nama kampung dalem, nyang maksud nye
ade di dalem kote betawi..
Ane pernah denger juge maenan belut putih
dari penuturan sodare-sodare
tapi kagak tau kalo tuh maenan dari ujung malang bekasi.
ga ade maksud mo ngutip maenan nye KH Nur Ali..
jangan2 ade hubungan nih??
-
Setelah membaca cerita yang begitu inspiratif dari penulis muda berbakat yang baru muncul...
Tidak ada kata lain selain : dahsyatt [top]..Top markotop [top] [top]..
Nggak nyangka dari pendekar berambut putih yang sejuk suaranya, halus pembawaannya, meski pernah didera serangan pinggang; lahir juga cerita menarik, tidak kalah dengan kopingho..
Ayo terus bang Ochid..Ditunggu lanjutannya..
Salam
S Birowo
-Mm bener : setting betawinya lebih bisa ditonjolin, tentu saja dengan nama ygn sedikit ditambah/kurang, biar gak sama dengan yg aslinya tapi tetep merek betawi Misalnya Kampung Tenabang Udik, Rawa Bangke Dalem..dll
-beberapa isitilah teknis perkelahian mungkin bagus dikasih gambaran/deskripsi lewat kata-kata, biar yg awam bealdiri dapet gambaran. Misalnya rambet, gedor, pecah,dll
-good work, keep on high spirit !!!
-
heheheee...
tengkyu bang sosro...setelah lama ga muncul
seperti biasa ente selalu penuh pujian
tambahin dong bang...
n.b
kayaknya perlu pertolongan Bang Admin
nih buat ganti Kampung Dalem
jadi Kebon Dalem
-
SOMAD JAGO MUDE KEBON DALEM
(3)
"Mad, mari lu.."
"Aye Kong.."
"Sekarang ude waktu nye gue cerite riwayat permaenan yang lu dapet dari babe lu,
waktu kite masih mude -gue ama engkong lu DulAmit- , betemen baek
ampe kayek sodare kandung. Kite bedue juge same-same doyan belajar maen pukulan..
Ampir semua pelosok kampung di Betawi kite jelajahin nyari guru pukul,
beguru ke macem-macem maenan.
Dari Merunde kite dapet, dari Tenabang, Rawe Belong, Kemanggisan, Kampung Rawe
, Kampung Benteng, Petojo, Ampe ke Bekasi ame Depok.
Engkong lu Si Dul Amit paling demen ame maenan yang keras-cepet
lu tau kendiri kan badan nye udaeh tue aje masih keker. Die juge cerdik,
dari semue maenan yang dipelajarin, di cipte in maenan kendiri
di ringkes, kayak yang lu udah apal entu.
Nah, asal lu tau aje, dari langkah satu aje tuh maenan udah muter empat penjuru,
kalo sodare kite nyang dari Jawe atawe sunde bilang PANCER
Coba lu peratiin.
Langkah lu udah lemes, udah alus gue paling cuman kasih lu kaedah-kaedah nye aje."
"Nah engkong kendiri pegi mane ceritenye?"
"Gue emang demen maen pukulan, tapi laen ame engkong lu almarhum,
gue lebih nekunin kaedah nye maenan, gue kagak bikin maenan baru..
kalo udah paham kaedah nye, lu kagak perlu ngapalin langkah ame jurus lagi,
di kalangan kan kagak perlu apalan, kagak perlu mikir. Kayak tadi siang, begitu lu mikir
gw bise tau, dan gampang banget jatohin lu"
"Aye belon paham, Kong?"
"Ntar juge lu paham, pelan-pelan aje dulu..
Yang utame lu kudu paham dulu, kalo maen pukulan tuh sebenernya buat ngasah batin
habluminallah wa habluminannas.."
"kalo habluminannaas aye paham kong, tapi kalo maen pukulan buat
hubungan kite ame Alloh pegi mane jalannye?"
"Heheheeee....entu die nyang orang kagak banyak tau,
mulein sekarang lu kudu ngarti, Alloh bersifat Rahman dan Rahiim,
pengasih dan penyayang, atas dasar entu Alloh nyiptain mahluk termasuk kite, manusie.
Sifat kasih sayang eni kudu kite jage dan per tanggung jawabin. Nah, orang yang bise
maen pukulan kudu bise nerapin nih makne, jangan mentang-mentang jago
se wenang-wenang ame orang laen. Lu di kasih berkah bise maen pukulan,
jangan asal nge beri aje, lu kudu tanggung jawab ame tiap perbuatan lu
kalo lu udah bise begitu, berarti lu udah ngejalanin perentah Alloh,
artinye lu udah ngejalin hubungan ame Yang Kuase, paham lu?"
"Sedikit, kong.."
"Dasar lu badan doang nyang diempanin, heheheee..."
Nyang kedue, Maen Pukulan atawe silat kagak ade nyang bagus juge kagak ade nyang jelek.
Bisa bagus ato jelek tergantung kite nye kendiri. Jangan pernah lu anggap sepele maenan orang.
Sikap takabur, sombong, riya' cuman bikin lu kagak awas..
Nyang ketige,
Jangan sekali-kali lu punye niat nyelakain musuh,
sebise-bise nye hindarin bekelai, kalo terpakse juge lu hindarin
nyerang daerah bahaye di badan musuh lu, paham?"
"Paham, kong.."
"Tumben lu bise paham...ngomong-ngmong, pegimane hubungan lu ame enur?
gue liat lu bedua mingkinan lengket aje..."
"Bujug dah, engkong lagi ceramah silat, kenape jadi nanyein enur?, engkong cemburu ma aye?
"Huahahahahaaaa....tenang aje, Mad. Urusan Babe nye Enur ntar gue nyang beresin.."
Sreeettt...Nyawe si Somad ngedadak loncat,
ati nye jejingkrakan. Nur...Nur Qomari, tunguin Abang ye..
-bersambung_
-
makk nyyoossss....ane demen banget neh cerita kayak gini bikin hidup lebih hidup....GRP deh buat Pendekar Berambut Putih...
d'boels
-
hehehee...tengkyu, cing
paling ente demennye ama bagian yang romantis..
entar kite masukin dah
tokoh jawara dodol bulukan
bagian ngerecokin si enur
tabek
-
ceileeeee...tau aje abang kite nyang atu eni...cepetan donggg dilanjut ceritenye.....udah kagak tahann nehh.. [lucu]
D'Boels
-
Huehue bang Dodol mo nginceng nyang roman2an ye?... cuit..cuit... O0 Ati2 bang ni tulisan gan Ochid menular kaya virus... kalo ente dah ketularan bakalan nyari tuh cewe nyang jidatnye mengkilat kaya si enur entu.. brabe pan???
@ Juragan kebon dalem: Mangstabh!! Sangat berciri bukan hanya betawi, bahkan maen pukulannye!!! Lanjut dah Gan.. ane ngambil kaedah nyang dibabar disini... bole ya!!! Nah gitu dong Gan, dibolehin...
Wassalam,
-
bole aje kang mantri...silaken dicomot nyang sekirenye ente cocok
name nye jg eni cuman pepesan kosong, asal goblek aje nih ane...
ni waktu kan pas bulan suci romadhon, si somad di suruh engkong nye
ngabisin waktu di musholla, i'tikaf sembari ngamalin wiridan, berdzikir supaye
selalu inget kelemahan kite sebagei manusie di depan Yang Maha Kuasa..
begitu deh..
-
yahh..mane die tuh trusannye? bang ochid sibuk syuting yeee...lama amet lanjutannye..
d'boels
-
yahh..mane die tuh trusannye? bang ochid sibuk syuting yeee...lama amet lanjutannye..
d'boels
bang ochid sedang sibuk ama putri..kolaborasi cersil..
hue..hue..hue...
PT
-
somad lagi khusuk ibadah romadhon,
kagak latian silat dulu...
sembari meratiin kabar nyang katenye juragan dodol lag meguru
ama jawara rawa bangke..meguru ilmu pelet buat ngedapetin tuan putri teratai
[lucu] [lucu]
-
waaakkk..(gedubraaakkkk!!!) :-P abang aye nyang atu eni emang paling suka ngemerahin muke adeknye dah ah.....fyi neh bang ..kate babe/encang/sepupu aye...dulu jaman masih mude, latihan mah jalan terus...dari abis traweh sampe mo sahur...tuh kebayang kan gimane perjuangannye untuk ngedapetin ilmu silat...
d'boels
eh..tuan puteri nyang mane ye?
-
d'boels
eh..tuan puteri nyang mane ye?
kagak ngakuin ye...? tiap hari ngintip gitu...
-
:-X sedih amat dapetin tuan putri teratai doangan...luna maya kek, dian sastro kek... :w
d'boels
-
:-X sedih amat dapetin tuan putri teratai doangan...luna maya kek, dian sastro kek... :w
d'boels
gak enak..kagak bise silat..he..he..he..
-
sape bilang...dian sastro pinter ngaji dan bikin puisi..silat bahasa, luna maya????
d'boels
-
sape bilang...dian sastro pinter ngaji dan bikin puisi..silat bahasa, luna maya????
d'boels
ya udeh...tapi mereka gak kuatan...gak bisa nyangkul..
aku dah naik turun gunung..kuat banget kakinye..sekali jepraaakkk..tepar lu..
-
Bang Ochid, ayo dong, lanjutin nih cerita. Aye udah nepsong Banget pengen tau kelanjutannya nih!
Top Banget dah Abang kita ini. [top] [top] [top]
-
hehehe..bisa aja nih kang zakka..
iya, blm ada ilham buat ngelanjutin nih cerita..
ane dah serahin bang dodol ama bang jali buat ngelanjutin,
secara tuh abang2 bedua emang pakarnya silat ama kebudayaan betawi..
tabek
-
emang banyak yg nungguin gan Ochid.. [top]
ane nih termasup salah duanya, jgn lupa nyelipin kaedahnya Gan... mangstabh!!
wassalam,
-
Insyaallah Kang MJ,
ma kasih atensi nya... 8)
-
abang aye nyang atu eni lagi sibuk mikirin negara...yah jadi maklum...si somad lg ngerjain PR dulu....gitu kan yah Bang?
d'buls
-
kang zakka, kang MJ, juragan dodol,
berkat dorongan ente2 pade, ni hari Somad udah mulein keluar kandang lagi..
sekali lagi,
ini cuman dongeng asal goblek, kagak ada pretensi ape2..
silaken di kritik dan di tambahin,
sumonggo
SOMAD...
(SAMBUNGAN)
Udah kire-kire dua taonan Somad digembleng ama engkong nye. Banyak perubahan yang Somad kagak sadarin dari tiap jurus ama teknik aplikasi yang die jalanin. Kalo liat sekarang die maen beda banget ama dua taun kemaren. Sekarang alus banget, tiap langkah nye udah kagak gedebag-gedebug lagi. Contoh nye kalo dulu die jalanin ni maenan udah kayak orang bekelai ama nyamuk aje, ketepak-ketepok, prak-prek.. ampe ade nyang bilang nih jurus tepok nyamuk segale.
Sebenernye jurus nye same aja, kagak dirubah sedikit acan ama engkong nye, cuman dipoles di sono-sini. “Jadi pada dasar nye tiap jurus dari aliran mana pun same aje, Mad.. Silat atawe maen pukulan Cuma punye 3 prinsip : nyerang, ngeles, ama nahan serangan. Variasi nye ente boleh cari sendiri..Kalo kite nyerang musuh, cuman ada dua pilihan : jatohin ato mukul. Mukul pan kagak mesti pake tangan, pake kaki juga sebenranya mukul juge.. Nah, waktu lu nyerang jangan sekali-kali mikirin teknik yang lu pelajarin, jangan mikir kudu begini, kudu begitu.. pegimane enaknye badan lu aje. Kalo lu kaku ama teknik, lu bakalan jadi robot, lu bakalan kagak bekutik kalo orang mendadak ngerobah arah serangan.”
Begitu deh kira-kira pelajaran dari engkong nye. Mule nye Somad rada kagok ama ni pelajaran, tapi dengan sabar ditekunin lama-lama die baru paham inti sari nye. Begitu die nyadar, semua gerak langkah nye jadi alus, jurus nye mengalir ngikutin rasa ati nye, kagak kaku lagi.
<<<0>>>
Rawe Belong,
Ni Kampung udah kondang banget sebage kampung nye jago-jago maen pukulan di Betawi, Siape nyang kagak kenal ama maenan Cingkrig, di sini dari mulein bocah ampe tue bangke kudu wajib bisa maen Cingkrig. Ni kampung terkenal sebagei tanah kelahiran Cingkrig. Dari sini Cingkrig nyebar ke seantero tanah Betawi. Siape nyang kagak kenal Ki Ali, Ki Yazid ampe angkatan nye Ki Sinan, Ki Goning ama Ki Sakam? Tiga tokoh terakhir kondang sebagei penyebar maenan Cingkrig dengan segala variasi nye. Permaenan Cingkrig khas ame gerakan cepet manpaatin serangan musuh, kuncian (rimpesan), silup (masuk, turun rendah). Cingkrig dari Ki Goning terkenal dengan kecepetan tangan kiri nye, langkah cingkrig nye. Ki Sinan terkenal dengan isian kedutannye (kontak) ama maenan golok nye. Kong Sakam nurunin permaenan yang cepet dan kude-kude yang rendah.
Kong Solikun, waktu mude nye sempet mondok di pesantren di Rawe Belong, di sini die dapet satu-due langkah dari Ki Ali. Disamping entu Kong Solikun juga belajar kaedah silat, falsafah dan moral dalam silat. Nah pelajaran moral eni yang belakangan bikin orang kagak ngeh kalo kong solikun tuh jawara sejati. Kagak pernah keliatan die jago, orang nye sedeng, alus ama kagak pernah mau bekelai disembarang tempat.
Belakangan, Somad baru tau kalo engkong nye tuh termasuk “orang gile ame silat”. Di samping hobi mondok keliling kampung, die juge hobi keluyuran belajar silat. Biase nye kalo pas prei bulan puase ampe lebaran temen-temen mondok nye pade pulang ke rumah masing-masing, Kong Solikun malahan keliling kampung nyari guru silat. Dari mulein Kebon jeruk, kampung duri, kedoya, kemanggisan, tenabang, Kwitang, Jatinegara..ampe kampung Dadap Tangerang die jabanin. Sempet dilatih kude2 rendah ame master kung fu dari cine di kampung benteng tangerang.
Cerite paling seru waktu Kong Solikun merantau ke daerah Pasundan. Di sini juge Kong solikun dapetin jodoh nye, mojang cianjur anak se mata wayang juragan tembako di Cianjur. Juragan tembako yang sederhana, baik hati dan soleh yang merupakan salah satu tokoh silat paling disegani di tanah pasundan. Di kampung Sunde eni Kong Solikun dapet pelajaran “rasa” dalam silat. Kong Solikun baru bise nikmatin maen silat setelah semua pelajaran nye diasah ama calon mertue nye. Kekayaan jurus dan gerak silat nya kong solikun jadi tambah mentereng dengan taburan rasa dari sini.. Ampir lima taun kong solikun netep di cianjur, mondok di pesantren calon mertue nye. Belajar ilmu agama, tarekat, dan kaedah rasa dalam silat. Sebagei perantauan dari tanah Betawi, Kong Solikun adalah murid yang paling moncer, cerdas, alim dan mumpuni dalam hal silat. Bukan cuman guru nye yang kesengsem, tapi juge sang bintang, Nyai Dyah Ratna Kusumaningrum putri satu-satu nya sang juragan.
===besok nyambung lagi, yee===
-
Mantabss [top] [top] [top]...Cerita yang kayak begini nih, yang aye maksud bisa menambah kecintaan orang ame silat tradisional. Ane baca ni cerita ampe ngiler beneran, serase ane yang jadi si somad, hua hua hua. [top] [top] [top]
Lanjutin Bang, pasti banyak yang nungguin...
-
Kapan bikin story tentang OCHID sendiri? Apalagi kalo OCHID itu berkelamin cewek!
Pasti judulnya : OCHID, DAUN MUDE DARI KEBON JERUK
-
sipp dah..ade kelanjutannye...ane kasih inputan entarannye ye bang......top bangettttzzzzzzzzzzzz
d'buls
-
Ane tambahin apa yak...?
Oh iye...setting taon nye taon berape bang? biar kite bise kasi masukan lokasi-lokasi yang berkenaan ame Rawe Belong dan kitarannye atawe tempat yg dijadiin setting pade masenye....
Misalnye taon 30...ade pabrik batik Blande berendengan ame pande besi di kitaran Palmerah... terus sesepuh2 jaman ntu,dll...bole jadi Somad maen ke Petojo nyang terkenal gudangnye Pabrik Es, skalian mandi dannyuci baju di kali Petojo Binatu, atawe Kuningan gudangnye Pemerah susu sapi....dll
Tabe'...Jali
-
@hidup,
kalo cewek dikasih nama ORCHID aja lebih pas
@kang zakka,
tengkyu apresiasi nya
@bang jali,
settingannya sengaja ane kambangin biar terserah pembaca aj yang berimajinasi
nah kalo sekarang ane lagi mundur ke jaman mude nye kong solikun,
kire2 beliau sepangkatan ato lebih tue dikit dari angkatannye Kong Goning
berhubung nih cerite cuman fiktif jadi emang sengaje
kagak ane karang percis ame jamannye,
begitjhuuuuu...
@dodol,
ente mah kelamaan kasih inputannye..
-
hahahahaha..kagak kebayang dah kalo bang ochid di panggil bang orchid...hehehehhehehehe....bang kalo kasih inputannye kudu liat dulu ape nyang masih kurang..kalo kagak ade nyang kurang..ngapain kasih inputan..gitchuuuuu juga bang..hehehe
d'buls
-
hayah....
banyak banget kurang nye, pak ustadz..
kurang bagus, kurang menarik, kurang bombastis, dll deh...
abis ini balik ke masa Somad digembleng engkong nye lagi..
-
Masukannya Bang Jali Jengki boleh juga tuh..., yang klasik-klasik kadang asik...
Lanjut ah, ditunggu nih Bang Ochid. Fans nya udah ngiler nih :P, ampe netes...
-
huaaaa...jadi malu kang.
iye emang masukan bang jali bagus banget, cuman kerene nih dongeng
emang gak pake konsep, asal njeplak aj,
jadi kebingungan sendiri kalo mo nyambung2in ma fakta sejarah.
maklum senongol nya di kepala aja yang ditulis..
bentar lagi deh,
Somad lagi di test ama engkong nye..
ma kasih buat sobat2 yang nyempet2in baca n kasih komen
tabek
-
hayyyyooohhh..penulis cerita kayaknya dituntut harus paham sejarah juga neh....
debuls
-
lanjuut mang......
-
gw jg demeeen banget ngikutin cerita ini... serasa kembali ke jaman sd waktu pos kota masih ada lembaran bergambar yg ceritain silat betawi... pengarang/yg gambar klo ga salah namanya adjis gaurav (buset, saking ngefans-nya sampe inget terus gw hehe)
eniwei, ane ada masukan dikit neh bang, cerita ini kan konteksnya betawi jaman dulu, kayaknya kaga pas deh klo ada dialog yg ada kata2 "robot", "variasi", karena blom dikenal jaman itu :)
pokona selalu gw tunggu cerita si somad ini deh... kangen gw ama lembergar poskota yg dulu berlembar lembar itu hehehe...
lanjoeeeet maaaaaang :D
-
ma kasih mas sabrang kidul..
@bang moemoe,
iye, bang ma kasih masukannye, hehehee...
bener juge ye ntar deh ane betulin
maklum name nye jg penulis dadakan...hahahahaha..
eniwey, salam kenal bang dari ane yang asal goblek
-
gw jg demeeen banget ngikutin cerita ini... serasa kembali ke jaman sd waktu pos kota masih ada lembaran bergambar yg ceritain silat betawi... pengarang/yg gambar klo ga salah namanya adjis gaurav (buset, saking ngefans-nya sampe inget terus gw hehe)
eniwei, ane ada masukan dikit neh bang, cerita ini kan konteksnya betawi jaman dulu, kayaknya kaga pas deh klo ada dialog yg ada kata2 "robot", "variasi", karena blom dikenal jaman itu :)
pokona selalu gw tunggu cerita si somad ini deh... kangen gw ama lembergar poskota yg dulu berlembar lembar itu hehehe...
lanjoeeeet maaaaaang :D
Iye bener bang, jadi inget masa lalu.
Ane dulu nge-fan juga tuh ame Adjis Gaurav, cuman paling demen bangat ame Hadi Noor.
Seinget ane Cergam di Pos Kota nyang top dan berlatar belakang silat Betawi di pos Kota:
Mat Koneng,Si Jampang, Si Jabrik, Si Jalu, Si Gobang, Ajian Pancasona. Ade lagi nyang seru cuman setting nye jaman karang yaitu Derry Tadarus.
Kira-kira masih ada yang punya gak ya, atau klipingnye gitu...?
Tabe'...
-
gw jg demeeen banget ngikutin cerita ini... serasa kembali ke jaman sd waktu pos kota masih ada lembaran bergambar yg ceritain silat betawi... pengarang/yg gambar klo ga salah namanya adjis gaurav (buset, saking ngefans-nya sampe inget terus gw hehe)
eniwei, ane ada masukan dikit neh bang, cerita ini kan konteksnya betawi jaman dulu, kayaknya kaga pas deh klo ada dialog yg ada kata2 "robot", "variasi", karena blom dikenal jaman itu :)
pokona selalu gw tunggu cerita si somad ini deh... kangen gw ama lembergar poskota yg dulu berlembar lembar itu hehehe...
lanjoeeeet maaaaaang :D
Iye bener bang, jadi inget masa lalu.
Ane dulu nge-fan juga tuh ame Adjis Gaurav, cuman paling demen bangat ame Hadi Noor.
Seinget ane Cergam di Pos Kota nyang top dan berlatar belakang silat Betawi di pos Kota:
Mat Koneng,Si Jampang, Si Jabrik, Si Jalu, Si Gobang, Ajian Pancasona. Ade lagi nyang seru cuman setting nye jaman karang yaitu Derry Tadarus.
Kira-kira masih ada yang punya gak ya, atau klipingnye gitu...?
Tabe'...
waduuuuh... kalah ngefans neh ane ame bang jali... sampe inget masing2 judulnya... [top] pateennn dah :) iye tuh, klo ada klipingnya kayanya asik juga neh bisa nostalgia eheheheheh...
@bang ochid: aduh jadi malu neh bang, justru ane yg kudu ngucapin salam kenal duluan... pan ane yang baru nongol disini eheheheheh... salut buat bang ochid yang udah punya ide dan inisiatif bikin cerita ginian... ntar lama2 kayanya bisa jadi skenario neh... tinggal diajuin ke yg bikin film merantau itu, jadi dah film silat merantau 2: The Somad Story... hehehe
-
O0 nungguin lanjutan cerita ampe rambut gondrong, blm lanjut-lanjut juga nih... minum dulu ah [beer] [gelas][muter]
-
hehehee...wah maap kang zakka,
lagi asyik ngikutin sepak terjang kong nizam dan 3 penjahat pendekar dr goa hydro nih
begantian dulu deh.. :)
-
somaaaad? lagi dimane luuuuuuu? buruan bantuin babe lu ngukur laut :)
lanjutiiiin dong bang ochid :D
-
>:( kapan kelanjutannye nich...... :'(
bang ochid mang [top]
-
akhirnya bakat terpendamnya kang Ochid muncul juga... [top]
ayo kang dilanjut lagi....seru niiih...
-
mudah2an yang membuat cerita eni bisa disambung lagi...udah bulukan neh.. x-))
debuls
-
ia niih...kok blm ada kelanjutannya lagi niih.... :D...
ditungguuu....
Bahasa Indonesia => Silat Diskusi Umum => Cerita Silat => Topic started by: Unknown on 21/08/2008 08:29